Tungjatjeta Jasmina!

Jasminës i pëlqen të dëgjojë muzikë, të shohë filma vizatimorë, të dalë shëtitje me motrën dhe vëllain. I pëlqen kur mami e vesh me rrobat e saj të preferuara dhe kur i përkëdhel kokën teksa i kreh flokët. Por më shumë se çdo gjë tjetër Jasminës i pëlqen të dëgjojë zërin e të atit në telefon. Kur ai e përkëdhel, ajo lëshon belbëzime gëzimi dhe sytë i shkëlqejnë.

Jasmina u diagnostikua me Sindromën Rett kur ishte vetëm 2 vjeçe, një sëmundje e rrallë gjenetike që e bën të sëmurin të humbasë të folurën, oreksin, lëvizjen e duarve dhe shumë funksione të tjera. 7 vjeçarja ka edhe kriza të shpeshta epilepsie.

E ëma, Mirela, tregon se që prej asaj kohe ata në çdo moment luten për shërimin e saj. “Nuk e besonim dot se si krejt papritur goca nuk na fliste më. Ndryshoi shumë, qante, nervozohej shpejt, rrëzohej në tokë...”- tregon Mirela.

Bashkë me të shoqin, ajo e solli në Tiranë. Për pak kohë vajza iu nënshtrua vizitave dhe terapisë së logopedisë. Por pas pak muajsh vajza u kthye në fshatin ku jetojnë, në Berzeshtë të Librazhdit. Gjatë gjithë kësaj kohe ajo nuk ka mundur të marrë asnjëherë shërbimet e specializuara për të cilat ka nevojë. E ëma na tregon se ata nuk kanë makinë dhe për të shkuar në qytet, tek qendra e shërbimeve, i duhet të dalë në rrugën e madhe e të presë furgonat e rastit. “Na ka ndodhur të presim edhe 30 min, po ku mbahet Jasmina…Ajo bëhet shumë nervoze dhe fillon grindet, bërtet. Të gjithë na shohin neve…”- rrëfen Mirela teksa tregon vështirësitë për t’i bërë ballë mentalitetit të njerëzve që “i mbyll” në shtëpi fëmijët me aftësi të kufizuara.

Vitin që shkoi, Jasmina, shkoi për disa kohë në kopësht. E ëma e shoqëronte dhe kalonte kohë me të, në mënyrë që vajza të përshtatej më lehtë, të ambientohej dhe të fillonte të mësonte diçka. Mirela bëri rolin e edukatores për të. Këtë vit, ajo kishte dëshirë që e bija të fillonte klasën e parë. “Kisha frikë. Ajo nuk ishte gati. Vendosëm që këtë vit ta çojmë më shpesh në qendër me shpresën që edhe krizat e epilepsisë do ta zënë më rrallë dhe shpresojmë që ta çojmë vitin tjetër në shkollë”- thotë Mirela.

Ajo lutet që e bija të përmirësohet. “Të më thërriste prapë “mami”...”- shprehet Mirela.

Që Jasmina dhe fëmijë të tjerë si ajo të mund të marrin shërbimet e specializuara, World Vision ka filluar programin Tungjatjeta, që do të mundësojë vizita në shtëpi për fëmijët me aftësi të kufizuara.

Si mund të dhuroni?

Raiffeisen Bank

Numër llogarie: 00 3088 0359

IBAN: AL60 2021 1013 0000 0000 3088 0359

SWIFT: SGSBALTX

Kartë Debiti / Krediti: http://www.tungjatjeta.al/#dhuro

Paypal: https://www.tungjatjeta.al/paguaj-me-paypal